Iring Sungkaban

pagkahimos sa panagway

sa iring nga puti

daw putli; walay tumong

nga dautan.

pagkahinay sa bayhon

nagpahiyom

daw anghel; gibuligan

sa kamaayo.

apan sa hilom nagpahipi

mata nagpanlingi

daw abtik; nagbantay

sa imong lihok.

naghulat sa tukmang higayon

tumong ipadayon

daw kawatan; unayon bisan

ang silingan

nagkabuling ang balahibo

sa iring nga puti

daw sadya; nanungkab sa kaban

sa katawhan.

ingon ana ka ba, Kongresman?

Prony (Bohol's Beloved Python)

sa dagway mo pa lamang
gikalisangan...
debuho sa yawa ang makita.

ulipon ba ni satanas ang lawas
'mong nagmangtas?
walay gipili ang kabangis

apan daw lahi ang tuyo mo
dinhi sa kalibutan...
dili ang paghasik og kagubot.

unsa'ng matang sa kasingkasing
nga aduna ka?
mas ligdong pa kaysa sa tawo.

gibati mo ba ang kalipay
sa matag pahiyom...
sa mga tawo nga nagsud-ong?

nakahibaw ka ba sa nahatag
'mong kadasig
sa matag mata nga moaninaw?

Apan walay nakamatngon sa tinuod
mo nga gibati...
Tungod kay ikaw usa lamang ka sawa.

Apan bililhon og ligdong ka nga higala
gihatag ang kinabuhi...
alang sa katawhan.

salamat, Prony.

(In captivity: since Oct. 31, 1996 and died on August 14, 2013)

Hilab

daw mura man ko'g gipanuhot

tungod sa tumang kagutom

hinay man gud ang dagan

sa jeep nga akong nasakyan

gikan sa Manalili.

dali akong misulod sa

pultahan sa Jollibee

mao ra may kan-anan nga akong nahibaw-an

pag-abot nako sa hi-way.

paghangad ko sa giplastar nga menu

sakto ra gyud ang nahabilin ko'ng kwarta

igo lang makapahunong sa reklamo

'ning tiyan nga naimpatso.

samtang ihungit ko na unta

ang lamian nga spaghetti

dunay mituktok sa akong kilid

didto man gud ko nakalingkod sa daplin

duol sa bungbong nga samin.

natagbo ang akong panan-aw

niadtong bata nga nagtuktok sa samin

luspad og buling ang panagway

samtang giantos ang hait nga bangkaw

gikan sa haring adlaw

Aduna pa siya'y giagak

batang nanghilam-os sa iyang sip-on

makita ko ang tumang kasakit

kagutom, kainit, apan wala'y mipili

sa paglingi.

Nagkakusog siya sa pagdukdok

gisugo sa tiyan niyang naghilab

murag nakabantay ang sikyu

dali silang giabog, giguyod palayo

wala ko biyae sa paglantaw

samtang mipalayo og mitabok sa kalsada

nagubot ang trapik kay sila nakabalda

hangtud nga mitabon kanila

ang baga'ng duot sa mga tawo

lawom ang pagpanghupaw og ginhawa

samtang gisud-ong ang pagkaon

mihungit ko'g kaduha, nawad-an sa gana

milad-ok sa tubig makausa

dayong uli nga lumoy ang abaga.

                          -(longix ceballos)

Hulga sa Unos

nagkisdum nasad ang panganud

'ning sayo'ng kabuntagon

kay wa may milapos nga sidlak sa adlaw

nga unta motuhog sa nagkadaiyang mga buslot

nga nagkatag sa atop sa among payag

timailhan sa nagpahipi nga kakuyaw

ning nagpadulong nga unos

dunay bagyo nga daw nagsingabot

matod pa sa gibansiwag sa karaan nga radyo

iya sa among silingan nga tigpatigayon

nga subling dugokon sa mga istambay matag buntag

aron maminaw og drama.

apan ning adlawa sayo sila nga mibiya

nag-iyahay sa pag-uli sa ilang panimalay

gisugdan ang paghigot aron makahata'g dugang kusog

sa atop nga gipabug-atan sa daang mga ligid

basin unya higupon sa daw uhaw nga kadaot

ning unos nga umaabot.

nianang pagkahapon, mibundak ang uwan

giduyugan sa hulga sa kusog nga hangin

milangtod na og mga duha ka oras

nagsugod na pagtaas ang tubig nga daw nagkamang

nga midayon sa among ganghaan

wala gayud kapugngi ang iyang kusog nga bul-og

gikan sa taas nga bahin ning among dapit

nga hulagway na sa sapa ning higayona.

gikumot ang among dughan sa kabalaka

samtang mipugos og biya sa among mga payag

nga gihulga'g lamonon sa hangi'ng nagkusokuso

didto kami misilong og nagdasok sa ibabaw nga bahin

sa balay sa among silingan nga tigpatigayon

kay ang iyaha lamang nga balay ang habog

og sementado sa among dapit.

didto among nakita giunsa sa delubyo

pagkawat sa among inampingang panimalay

nga sa hinayhinay gipangbanlas

gitamparos og gipangtamastamasan

ning pait nga kapalaran.

nagkisdum nasad ang panganud

'ning sayo'ng kabuntagon

inanay na'ng mituyhakaw ang adlaw

nag-iwag sa nagkagubot nga paraiso

og hinayhinay kami nga mitaak sa lapok

aron pagbanhaw sa among kinabuhi.

                        -(longix ceballos)

Softdrink

Mura ko’g natuk-an samtang

Nagsuyop sa bugnaw nga softdrinks

Kalit man lang ka’g kuhit sa akong kilid

Pagkagilkanon ko ra ba

Dayon ra ba’g bukad sa buling nga palad

Buot pangayoon ang sukli- tulo ka piso

Kadtong gitunol sa tindera.

Pagkahugaw ba ang dagway ‘ning bataa

Murag makaligo ra ni kung dunay uwan

Pangka-init ra ba sa panahon karon

Nangalisbo na ang isog niya’ng baho

Nagsige ra ba’g hikap sa bag-o ko’ng t-shirt

Hinatag ra ba ni sa akong hinigugma

Kausik ba ani kung mamantsa

Tan-aw ko murag dies anyos na ning bataa

Murag wa intawn paeskwelaha libre ra man unta

Wa pa gyud gipacheck-up bisan diha lang

Sa libre nga health center sa atbang

Nagsige lang og hingos sa tin-aw nga sip-on

Way undang nga nagsaka-kanaog

Sa iyang mubo nga ilong.

Wala na hinuon ko nakabantay

Hurot na diay ang kataposang tulo

Sa softdrinks nga akong gisuyop

Apan gibati pa gihapon ako’g tumang kauhaw

Samtang nagsud-ong niadtong bata nga nagpanlad-ok

Sa iyang kaugalingong laway

Ako unta siya’g palitan og softdrink

Parehas niadtong akong giinom kaganiha

Apan tres pesos lamang ang akong sinsilyo

Nakonsensya naman hinuon ko aning hitaboa

Nagkaluspad na ra ba ang iyang lagum nga wait

Palitan lang ko ni’g duha ka pan de sal

Aduna may gamay nga bakery sa unahan

Paresan lang ug pinutos nga iced water.

                                        -(longix ceballos)

Adik

Abtik ang lihok, siga ang mata

Bahala'g wala'y kaon, naghilab ang tiyan

Counter Strike lang ang pamahaw

Dota ang miryenda, paresan la'g katawa

Empatso ang resulta niining binuanga

Farmville og Farmtown ang giuna

Gibadlong ni Mama, gikutas nga nagasaba

Hala, wala intawn lingia og paminawa

Igo lang nga nitando, nagbako ang bukobuko

Just wait lang daw una, busy pa kaayo

Kay hapit na molahos ka game-over

Last life nalang nahibilin sa Ninja Saga

Mohapit pa og click sa laing duwa

NBA Live, SF, Starcraft, FIFA

Og naa pa diay ang Angry Birds

Plants vs. Zombies og Monopoly

Quarter to alas dose na ang takna

Ragnarok gihapon ang hunahuna

Sakit man lang hinuon ang makuha

Tungod sa kalingawan sa mga bata karon

Utok ang unang mataptan sa

Virus daw sama sa kaisog sa characters sa

Warcraft, nga sagad nilang gikahinaman

Xerox copy sa usa ka maka-adik nga bisyo

Yano nga mi-delete sa maayong pamatasan; nag-enter sa

Zigzag nga dalan, sarang kapaingnan.

                              -longix ceballos

Kawatan

(graft and corruption sa gobyerno)

iuli na intawn higala

ang sinsilyo sa akong ginikanan

nga giwaldas sa imong kaugalingong

kalingawan.

Adunahan man ka ha ka?

dili malalis ang imong katakos sa bahandi

nga imong gidiga sa among atubangan

niadtong nagkinahanglan ka sa among

mga tingog; nagalaum intawn kami.

ayaw intawn mi hikawi

sa imong pagsanong; ikaw lang ang alagad

daw hari nga giduyan sa mga singot

sa mga tawo.

Ikaw lang ang ulipon nga dunay kaisog

nga moyatak sa imong mga agalon

og kami lang ang agalon nga nabuhi

sa buling nga palad.

Hatagi kami'g kadasig nga

moatubang sa kaugmaon.

ibalik ang among mga kalag nga nagkatibulaag

walay kapaingnan.

Tahura ang dungog sa imong ngalan

ayaw pahimusli ang among uyamot nga kinaadman

og kung tig-a gayud ang imong kasingkasing

moabot ra ang adlaw sa pagpukaw

sa imong konsensya.

kung mahitabo man kana,

palihug ko'g silot sa imong kaugalingon.

- longix ceballos

Ang Akong Idol

Tam-is ang iyang mga pulong

Sama sa ka-tisoy sa iyang bayhon

Daw maayong pagkakubit

Ang mga tawo nga migunit

Sa taga nga nagtangag

Og paon nga baynte pisos.

Sa paon nga baynte pisos

Nakapalit si Nanay og

Tunga sa kilo’ng bugas

Samtang si Tatay giuna

Ang pag-ambit og tuba

Giutang pa ang sobra

Kay kulangan iyang kwarta

Kulangan iyang kwarta

Nga hinatag niadtong tisoy

Nga nagdiskurso sa entablado

Duol sa munisipyo

Nagkatag iyang litrato

Sa tanang eskina sa sitio.

Sa tanang eskina sa sitio.

Madungong ko ang iyang pangalan

Edukado, abogado, adunahan

Usahay mahimong lalis sa among silingan

isig pasikat sa idolo’ng gidapigan

napulo man daw ang midangan

sa pagka-Kongresman.

Sa pagka-Kongresman

Midaog gayud ang akong idol

Nagparada pa gani libot sa among lungsod

Midugok ang katawhan galaum nga matuman

Ang mga saad nga iyang gibuhian.

Ang mga saad nga iyang gibuhian

Sama ka-tisoy sa iyang bayhon

Apan sama sa mga litrato

Nga nagkatag sa among sitio

Inanay nga napapas ang iyang dagway

Nabanlas, gibaklas, gilabay

Gilubong sa limot.

Gilubong sa limot

Ang kaniadto nga humot nga saad

Nga nabayran lang sa gilukot

Nga baynte ka pisos

Maghulat nalang intawn

Og dugang tulo ka tuig

Kay ang among kanhi idol

Dili na man maduol.

               -(longix ceballos)